“Dağ çiçəkləri”
Allahım bilir
70 yaşıma
Yetmiş il – ömrümün o baş, bu başı,
Yetmiş il – könlümün sirri, sirdaşı.
Ölçüsü-biçisi bir məhək daşı,
Doğrusu, düzünü Allahım bilir.
Hələ Günəş doğur, hələ Ay batır,
Hələ bahar gəlir, hələ yay çatır.
Deyəsən, Tanrıdan mənə pay çatır,
Səksəni, yüzünü Allahım bilir.
Əlindən tutduğum axşam, səhərdir,
Dörd yanım bəmbəyaz xatirələrdir.
Çapdığım, qovduğum nallı kəhərdir,
Yolunu, izini Allahım bilir.
Ölüm gizlənibdir qaşımın altda,
Soyuq daşları da başımın altda.
Gülüşüm üzdədir, göz yaşım altda,
Odumu, közümü Allahım bilir.
Yazdım yazdığımı mən sətir-sətir,
Umub, umacağım görən bəs nədir?
Qəlbimdən boylanan şirin nəğmədir,
Dilimin sözünü Allahım bilir.
Körpə ümidlərim hələ ki canda,
Günlər təlatümdə, il həyəcanda.
Qovrulur arzular qaynar qazanda,
Dadını, duzunu Allahım bilir.
Çölüm, çəmənimdə solur çiçəklər,
Sükutlu nəğmədir ağ kəpənəklər.
Başımın üstündə uçur mələklər,
Beş arşın bezimi Allahım bilir.
Murad Məhərrəm
Sözlərində həqiqət yatır
Fikrim fikirlərdən üstün olubdur,
Dərdim daşdan çıxan tüstüm olubdur.
Qurdum bir tərəfə itim olubdur,
Çomağı əlimdən mən necə qoyum?!
Ağız deyən çatmır şeşə qulağa,
Yarpaq da etibar etmir budağa.
Küləyin zəhmindən düşür torpağa,
De, buna neyləsin günəşim, ayım!?
Çıxan can bir daha geri qayıtmır,
Atılan o ox da geri qayıtmır.
Qəflətdə yatanı güllə ayıltmır,
Susmasın, nə etsin qoşun, alayım?!
Zabit zabit olar, əsgər güclüsə,
Sərhəd sərhəd olar, səngər güclüsə.
Sipər sipər olar, əllər güclüsə,
Onu qıra bilməz selim, dağ çayım!
Birlikdə ölçülür əzəmət, Vüqar,
Birdir Kəpəz, Şahdağ, Savalan, Qoşqar.
Bir güllə heç zaman açılmaz bahar,
Olubsa, göstərin, görüm, qoy duyum!
Mövlud, sözlərində həqiqət yatır,
Saflığa, paklığa sədaqət yatır,
Qəlbində Vətənə məhəbbət yatır,
Bunu küləklər də deyir ki, yayım!..
Mövlud Teymur
Nura döndün
Ay da yollarıma, nur ələyəydi.
Leyla Əliyeva
Özün də bu yolda,
Bir nura döndün.
Ulduzlar nurundan,
Nur aldı o gün.
Ay da şahidliyə,
Nuruyla gəldi.
Haqqına tapınan,
Haqqa düzəldi.
Bu yol elə bir yol
Gedən yorulmaz.
Dinlədi, dərdlini
O, darda qoymaz.
Səsinə qoy hamı,
Bir anda gəlsin-
Vətən, vətən deyə,
Yanan da gəlsin.
Bu yol uğurlu yol,
Müqəddəs, təmiz!
Böyükdür necə də,
Axı qəlbiniz!
Alik Dənizsevər
Sənsiz
Olmasın bir günüm sənsiz,
Hara yetər ünüm sənsiz?
Qoy bu yoldan dönüm sənsiz,
Getsəm, bu yol bitməyəcək.
Ah çəkirəm, oyan, diksin,
Son evini fələk tiksin.
Gözlərimdən gülən əksin,
Getməyəcək, itməyəcək.
Sən əbədi əhli-dilim,
Sənsiz dərddi ayım, ilim.
Nizaminin, ay sevgilim,
Günü sənsiz ötməyəcək!
Nizami Göyçəli
Eləyir
Yavaş-yavaş dostlar bizi,
Qoyub gedir, tərk eləyir.
Yaxşı günün qədrin insan,
Yaman gündə dərk eləyir.
Yaşamayaq ömrü hədər,
Dünya fani, gəldi-gedər.
Həsrət, hicran, qüssə, kədər
Şirin canı tərg eləyir.
Sanki uçur ömrün atı,
Ömrümüz bir qum saatı.
Zalım fələk zarafatı,
Son məqamda bərk eləyir.
Nəzifə Təhməzqızı
Təvazökar adam
Sən məni çatdırdın çox arzulara,
Yoluma nur saçdı xeyirxahlığın.
Əlinlə qol çəkdim çox uğurlara,
Təriflər eşitdim hey yığın-yığın.
Gözünlə baxıram gələn sabaha,
Uğura aparır göstərdiyin yol.
Səninçün qiymətli, çox şeydən baha,
Ürəkdən deyilən adi “Çoxsağol”.
Təvazökar adam, gözütox adam,
Tanrı hifz eləsin, yaxşı ki varsan.
Sənin varlığınla rahatam, şadam,
Təmiz, saf adınla sən bəxtiyarsan.
Şərqiyyə Balacanlı
Salam, əsgər
Salam, əsgər, salam olsun şərəfinə, adına,
Can qoymusan, yetişmisən sən Vətənin dadına.
Zəncirləri qıra-qıra, od-alovdan keçmisən,
Hər bir qarış torpaq üçün müqəddəs and içmisən.
Sağ ol, əsgər, yarıb keçdin təlatümlü sədləri,
Calaq etdin bir-birinə düşmən qıran illəri.
Yorulmadan, usanmadan qəhrəman tək vuruşdun,
Bütün düşmən sədlərinin, önündə sən durmuşdun.
Cəsur əsgər, nə durmusan, Vətən sənin and yerin,
Bu vətənin harayına, çağrışına hay verin.
Qoy qalmasın yağı düşmən, bir dənə də, vur, öldür,
Gülləkeçməz sinəni ver, qalx ayağa, dur, öldür.
Sən vətənin xilaskarı, ucalardan ucasan,
Tarixləri yazanda sən, yeni tarix yazarsan.
Hər bir uca zirvələrdən as üçrəngli bayrağı,
Qoy yurdumun azad olsun hər qarışı, oylağı.
Qalx ayağa, igid əsgər, səninləyik, durma, vur,
Bu düşmənə qoy dərs olsun, ümüdləri qırma, vur!
Neçə illər bu torpağın sinəsinə dağ çəkən,
O düşməni əzən, yıxan, nər, qəhrəman oğulsan.
Aman vermə baş qaldıra, o mənfuru dağıt, sök,
Qanmayana elə dərs ver, kəs boğazın, qanın tök.
Vətən bizim qeyrətimiz, şərəfimiz, şanımız,
Biz vətənçün doğulmuşuq, halal olsun qanımız.
Anasının arxasında gizlənənə ar olsun,
Silahına sarıl, əsgər, Allah sənə yar olsun!
Sən qeyrətin beşiyində halallıqdan öc aldın,
Vətən səni çağıranda namusundan güc aldın.
Gizlənmədin “var-dövlətin”, haramlığın dalında,
Sən kişisən, hünərlisən, o yazılıb alnında.
Vətənini qoyub qaçan gədələrə inanma,
Silah götür, düş qabağa, vətən darda, yubanma.
Salam olsun sən əsgərin şərəfinə, şanına,
Vətən sənin namusundur, namərd qurban canına.
Məbudoğlu səninlədir, bir ürəkli neçə can,
Qoy eşitsin bütün dünya, Qarabağ-Azərbaycan!
Rüstəm Məbudoğlu
***
Dərd üstündən dərd gəlir, vermir ara mənimçün,
Sağaldandan olmadı təbib yarə mənimçün.
Düşünür qarə günü ağartmaq əldən gəlir,
Ayırıb pis günündən günüqarə mənimçün.
Bu iş hansı naşıya həvalə olunubsa,
Düşüb bəxtin yaxşısı ixtisarə mənimçün.
Oturub nə zamansa şirin-şirin yediyim,
Dönüb bu gün ağuya, zəhrimarə mənimçün.
Caıamağa sınanı verirlər ki, al, cala,
Tikə-parə olmayan olub parə mənimçün.
Tül geyənin yanında hazır olmadadı tül,
Tapılmayır nə atlaz, nə də xarə mənimçün.
Arzu-kam olduğundan elin bəxtiyarlığı,
Dönüb, Tamam, Vətən, el bəxtiyarə mənimçün.
Tamam Nur Tağlabiyanlı
Bayatılar
Gün batdı, axşam oldu,
Bir günüm də tam oldu.
Sənsiz qalan ürəyim
Səndən ötrü şam oldu.
Görmədi Murov məni,
Tutdu qar, qırov məni.
Atıb yaralayaydın,
Sanaydın bir ov məni.
Gülün gecə təri var,
Açan gülün zəri var.
Mən sevdiyim igidin
Dağlara bənzəri var.
Dağlara baxıb gəldim,
Sulartək axıb gəldim.
Göndərdiyin gülləri
Telimə taxıb gəldim.
Yar gəldi, hara getdi?
Çəkildim dara, getdi.
Hicran, həsrət əlindən
Günlərim qara getdi.
Taqət yox dizlərimdə,
Nəfəsin sözlərimdə.
Mən səni ömür boyu
Gəzdirdim gözlərimdə.
Sayad Abulova
