Mədəd Rzaoğlu
1969-cu ildə İsmayıllı rayonunun Diyallı kəndində anadan olub. 1993-cü ildə Azərbaycan Texniki Universitetini bitirib. 1980-cı ildən Sumqayıt şəhərində yaşayır. Sumqayıt Dövlət Texniki Kollecində müəllim işləyir. Ə.Kərim adına Sumqayıt şəhər Poeziya Klubunun üzvüdür. Şeirləri ilə dövrü mətbuatda çıxış edir. Həmyerlimizin 2 şeirini oxuculara təqdim edirik:
Azərbaycan
Azərbaycan! Anam mənim,
Bir gül üzlü sonam mənim.
Azərbaycan! Göz bəbəyim,
Sən keçmişim, gələcəyim.
Azərbaycan! Görən gözüm,
Həm ilk sözüm, həm son sözüm.
Azərbaycan! Diləyimsən,
Qılınc çalan biləyimsən.
Azərbaycan! Sən canımsan,
Damarımda al qanımsan.
Azərbaycan! Sən bir gülşən,
Süsən, sünbül, qızılgülsən.
Azərbaycan! Neçə vaxtdır
Yaralıydı bağrın sənin.
Məlhəmiylə şəfa tapdın
Bizim cəsur əsgərlərin.
Nə yaxşı ki, vətənimin
Onlar kimi mərdləri var.
Bizim üçün övladdırlar,
Düşmən üçün şir, canavar.
Biz onlardan nə desək də
Yenə azdır, azdır, dostlar.
Aslan kimi kükrəyərək,
Onlar aldı necə postlar.
Düşmənlərin başı üstə
Şimşək kimi siz çaxdınız.
Bu möhtəşəm qayalara
Deyin necə bəs qalxdınız?
Sizin cəsur addımınız
Necə düşmən bağrı dəldi.
Bir erməni komandirin
Hürkmüş, qorxaq səsi gəldi:
“Gərək mənim Aşot babam
Bu günləri bir bilərdi.
Gəlin qaçaq buralardan
O gələnlər “zombi”lərdi”.
Heç sözünü qurtarmamış
Gördü gəldi türk silləsi,
O dağları bürümüşdü
İgidlərin gur nərəsi.
Mərdliklərə şahiddirlər,
O möhtəşəm, sərt qayalar.
Daha bir də görməsinlər
Heç vaxt kədər, dərd qayalar.
Azərbaycan, nə xoşbəxtsən,
Vardır belə igidlərin.
Qarşısında baş əyirik
Cəsur, qorxmaz o mərdlərin.
Saralmış yarpağa elegiya
Saralmış bir yarpaq idim,
Yapışmışdım budağımdan.
Hər baxanda utanardım,
O qocalmış saplağımdan.
Bir az külək əsən kimi,
Qorxub tit-tir titrəyərdim.
“Ayıracaq indi məni
Budağımdan” mən deyərdim.
Birdən möhkəm külək əsdi,
Ayrıldım mən budağımdan.
Həm qorxdum, həm çox utandım,
Həyatından, bu çağımdan.
Külək məni hey uçurdu,
Gördüm çölü, həm çəməni.
Sonra bir yol kənarında
Kol dibinə atdı məni.
Çox üşüdüm, qış gəlincə
Üzərimə qar sərildi.
Kim görmüşdü belə dərdlər,-
Dərd üstünə dərd gəlirdi.
Gəldi yenə bahar fəsli,
O əritdi yağan qarı,
Kol dibindən bir bənövşə
Hey baxırdı mənə sarı.
Bir də gördüm yolla gəlir,
Bir cavan qız, bir də oğlan,
Qız oğlana heyran idi,
Oğlan da ki, qıza heyran.
Birdən oğlan qıza dedi:
– Ay ömrümün ilk gülşəni
Dərib taxım qoy yaxana
Kol dibindən bənövşəni.
Oğlan bizə tərəf gəldi,
Addımları çox mətindi.
Ayaq basdı üzərimə, –
Buna dözmək çox çətindi.
Elə bil ki, bağrım yandı
Xıncım-xıncım parçalandım.
Həyat nəymiş, ölüm nəymiş,
İndi bildim, indi qandın.
Həyatdakı ən böyük dərd
Nə tufanmış, nə küləkmiş
Elə dünya boyda bir dərd
Ayaq altda əzilməkmiş.