Xalça fabriklərində “Açıq qapı” günü keçirilib
5 may ölkəmizdə xalçaçılar günü kimi qeyd olunur. Bu səbəbdən İsmayıllı rayonundakı xalça fabriklərində “Açıq qapı” günü təşkil olunub. Pandemiya qaydalarına uyğun təşkil olunan tədbirdə ziyarətçilərə Azərbaycan xalçaları haqqında ətraflı məlumat verilib. Bildirilib ki, bir ilmədən başlayaraq ortaya çıxan bu möhtəşəm sənət əsərləri Azərbaycanda qədim dövrlərdən istehsal olunub.
2010-cu il noyabrın 16-da UNESCO-nun qeyri-maddi mədəni irs siyahısına daxil olan Azərbaycan xalçalarının içərisində Şirvan xalçalarının özünəməxsus yeri var. Dövlətin daim diqqətində olan bu qədim sənəti yaşatmaq fikrinə dəstək olaraq Prezidentin müvafiq sərəncamları ilə İsmayıllı şəhərində “Azərxalça -1” və “Azərxalça -2” fabrikləri tikilib istifadəyə verilib. Bunlardan əlavə bu gün İsmayıllı rayonunda özəl xalça sexləri də fəaliyyət göstərir. Həmçinin qeyd edək ki, İsmayıllı Peşə Təhsil Mərkəzində bu sənəti yaşatmaq üçün xalçaçı ixtisası tədris olunur. Xalça fabriklərində “Açıq qapı”nın keçirilməsində əsas məqsəd tariximizi, adət-ənənələrimizi, tarixdən bizlərə miras qalan və bu gün də aktual olan sənət növlərini gənc nəsillərə aşılamaq, sevdirmək və gələcəyə ötürməkdir.
Xatırladaq ki, Azərbaycan Respublikasının Prezidenti cənab İlham Əliyevin 5 may 2016-cı il tarixli sərəncamı ilə “Azərxalça” Açıq Səhmdar Cəmiyyəti yaradılmışdır. Cəmiyyətin əsas vəzifəsi xalça və xalça məmulatlarının istehsalı, ixracı, onların ölkə daxilində və xaricdə satışının təşkili, xalça və xalça məmulatlarının istehsalında yeni texnologiyaların tətbiqi, maddi-texniki bazanın müasirləşdirilməsi, habelə bu sahənin inkişafı ilə bağlı digər işlərin yerinə yetirilməsindən ibarətdir. “Azərxalça”nın yaradıldığı gün – 5 May – Xalçaçıların Peşə Bayramı Günü kimi qeyd olunur.
