6 aprel 2023-cü il tarixində Mingəçevir Dövlət Universitetinin (MDU) Tələbə Qəbulu üzrə Təbliğat-Təşviqat İşçi Qrupunun nümayəndələrinin İsmayıllı Rayon Təhsil Sektorunun tabeliyində olan 3 nömrəli məktəb-lisey, 1, 2, 4, 5, 6, 7 nömrəli şəhər ümumtəhsil məktəblərinin pedaqoji heyəti, X-XI sinif şagirdləri və valideynlər ilə görüşləri baş tutub.
Görüşlərdə MDU-nu Elm və innovasiyalar şöbəsinin müdiri, dos. Vüqar Mustafayev, İnformasiya texnologiyaları kafedrasının müdiri, tex.f.d. Aidə Mustafayeva, Tədris şöbəsinin əməkdaşları – Azad Mirzəbəyov və Günel Baxşiyeva təmsil ediblər.
Görüş iştirakçılarına MDU-nun rektoru Şahin Bayramovun salamları çatdırılıb, ali təhsil ekosisteminə uyğun hədəf və məqsədləri, təlim-tədris prosesi, startap-hakaton, elmi-tədqiqat işləri, yerli və beynəlxalq əməkdşalıqlar, yeni kampus layihəsi, tələbə-mərkəzləri, tələbə qəbulu və ixtisaslar, təcrübə-mübadilə proqramları, tərəfdaşlar və layihələr haqqında məlumat vizual şəkildə auditoriyanın diqqətinə çatdırılıb.
MDU ilə bağlı infoməlumat auditoriyanın marağına səbəb olub. Məktəblilərin, müəllim və valideynlərin çoxsaylı sualları işçi qrup üzvləri tərəfindən cavablandırılıb.
Görüşlərin yüksək təşkilinə görə işçi qrupunun üzvləri İsmayıllı Rayon Təhsil Sektorunun rəhbərliyinə, təhsil sektorunun metodisti Ülviyyə Zeynalovaya, 3 nömrəli məktəb-liseyin direktoru Əhmədağa Ələkbərova, 6 nömrəli tam orta məktəbinin direktoru Qalib Bəşirova, görüş iştirakçılarına MDU adından dərin minnətdarlıqlarını bildiriblər.
Ü.Zeynalova