Qəbələ

Zirvəsi buludlu dağlar səndədi.

Ətirli, meyvəli bağlar səndədi.

Deyirəm, nə gözəl çağlar səndədi.

Ay bizim Qəbələ, bizim Qəbələ.

Qozların qaldırsın göyə boyunu,

Şonqar bulağının içək suyunu,

Hər gənc övladının görək toyunu,

Mən də o toylarda süzüm Qəbələ.

Tahirli Şərifin yaxın həmdəmi,

Nəğməkar oğlumdur, Hacıyev Təmi.

Hələ tökməmişdən güllər şəbnəmi,

Səhərlər dəstəylə üzüm, Qəbələ.

Sapı özümüzdən olan balta

Meşəyə dedilər yeni xəbər var,

Səni qırmaq üçün gəlir adamlar.

Meşə inanmadı deyilən sözə,

Düşündü biz çoxuq, güc çatmaz bizə.

Dedilər insandı, əlində bir şey,

Özü poladdandır, kəsir, tökür hey,

Adısa baltadır, sapı da bizdən.

Bax indi inandım deyilənə mən.

Söylədi meşə, indi şübhəm yox,

Sapı bizdəndirsə qorxuludur çox.

                          Tahir Şəriflidən  

Qəbələyə gedirəm

Uşaqlar üçün

Bar bəhrəli payız gəlib,

Qəbələyə gedirəm mən.

Sərin günlər çox tez gəlib,

Əl çalıram sevincimdən

Qəbələyə gedirəm mən.

Armud əyib budağını,

Alma silib yanağını,

Bağ gözləyir qonağını,

Gərək dərəm meyvələrdən.

Qəbələyə gedirəm mən.

Zəng eyləyir nənəm mənə,

Çağırıbdır dönə dönə

Atam ilə bugün yenə,

Sözə əməl edirəm mən

Qəbələyə gedirəm mən.

                           Şakir Xəyal  

Haqq ədalətlə birgə çəkilir adın

Allah adam,  qələm dostum Şakir Xəyalın 89 yaşına

89 ildə çox vaxt öz qayğılarını unutdun,

Xalqın dərdini unutmadın,

Şərəfsizləri söz gülləsinə tutdun,

Çox vaxt yekə başların harın nəsihəti səni bezdirdi yordu.

Məhəbbət sözünün kölgəliyində

Hicranın özü də şirin əzab oldu.

Zəmanə səni çox bərkə boşa saldı,

Paxıllığını çəkənlərin paxıllığı özünə qaldı,

Can atsa da korlaya bilmədi.

Səni nə hakimiyyət nə də pul,

Təkcə qələmindən çıxan yazılarına oldun qul

Çünki sən allahın ağlamağını da görmüsən, gülməyini də.

Kirpiyində dincələn göz yaını silməyini də.

Geniş ürəkli insan

Xeyriyyəçi Faiq Hüseyn oğlu İbrahimova

Ürəyi genişdir, dəniz tək qədər,

Xalqına həmişə köməklik edər.

Olduqca sadədir onun xilqəti

Eldə çox ucadır, ad san hörməti.

Savab əməlləri minlər ilədir.

Işləri qurtarmaz saysan birbəbir,

Xızır İlyas kimi yetişir dada.

Çalışır bir kimsə getməsin bada,

Nəcib əməllərin sayıram hərdən

Neçə yıxılanı qaldırıb yerdən

Neçə neçə gözdən silibdir yaşı

Odur ki, dağ qədər ucadır başı.

Kasıba fağıra uzanıb əli

Bunun üçün qəlblərdə vardır heykəli.

Doğma Qəbələnin bu vətəndaşı

Sap-sağlam yaşasın yüz əlli yaşı!

                                    Fərman Əziz  

Evin yaraşığı

Evin yaraşığı, evin bəzəyi.

Qadındır, qadınsız ev nəyə bənzər.

Ocağı yansa da o ev isinməz.

Qadın hərarəti olmasa əgər.

Qadınla bərabər yaranıb həyat,

Qadındır dünyanın əşrəfi məncə

Analıq qadının tacıdır, əlbət.

Anasız körpələr möhtac sevincə

Əmirxan Burzuyev  

Heç

Pula səcdə edən kəslər,

Pula səcdə düşürmü heç?

Ay qibləsi, haqqı tərslər,

Odsuz yemək bişirmi heç?

Öz həddini kim ki aşar,

Düz yolunu bir gün çaşar,

Tuluq olsun yaxud da şar,

Üfürməsən şişərmi heç?

Demə Cəlil haqdan doyub,

Dərd qəlbimi elə oyub…

Ağlı olan eli qoyub,

Yaddan arxa seçərmi heç?

Cəlil Xeyirbəy

Yadında saxla

Ey insan dayan!

Düşün anbaan!

Eşit hər zaman!

Yaşamaqda səs küyü,

Eyş-işrəti yox,

Mənanı qan.

Yaşamaq keçən zaman deyil.

Yaşamaq mənalı ömürdür,

Ömrü zamanla yox,

Əməklə ölç.

Halal zəhmət yaşamaq deməkdir.

Zəhmətsiz keçən ömür,

Ömür deyil.

Küçə qadını ilə tanış olmaq kimidir.

Haram mal toplamaq,

Küçə qadını ilə evlənmək kimidir.

O əvvəl-axır sənə xəyanət edəcəkdir.

Bunu yadında saxla, yaşa!

                              Sədiyar Səfərəliyev