İsmayıllı şəhər 3 nömrəli orta məktəbin (hazırda məktəb-lisey) kollektivi təhsil ocağının fəaliyyətə başlamasının 50 illiyini təntənə ilə qeyd edir. Məni də yubiley şənliyinə dəvət etdiklərinə görə, məktəbin rəhbərliyinə təşəkkür edirəm. Dəvətli olsam da, uzaqda olmağım və səhhətimlə bağlı iştirak edə bilmədiyimə görə, təəssüflənirəm. Yubiley şənliyini internetdən izlədim və özümü bir anlığa oradakı dostların arasında hiss etdim.
3 nömrəli məktəbin fəaliyyətə başlamsı ilə bağlı mənim də yaddaşımda maraqlı xatirələr var. Həmin ildə rayon üzrə orta təhsildən kənarda qalan gənclərin orta təhsilə cəlb olunmasını təmin etmək məqsədilə İsmayıllı Rayon Qiyabi Orta Məktəbi yaradılmışdı. Həmin vaxta qədər Sumqayıtda müəllim işləyən (mərhum dostumuz) Fərman Bəşirov məktəbə direktor, mən də təlim-tərbiyə işləri üzrə direktor müavini vəzifəsinə təyin olunmuşdum. Məktəb bütün rayonu əhatə edirdi və hər bir kənd məktəbində Qiyabi məktəbin məntəqəsi və məntəqə müdiri vardı.
Həmin vaxtlarda belə bir qayda vardı ki, yeni təyin olunan məktəb rəhbərləri RPK-nın bürosunda təsdiq olunmalı idi. Bu məqsədlə də Qiyabi Orta Məktəbin və 3 nömrəli məktəbin yeni təyin olunmuş rəhbərləri büroya dəvət olunmuşdular. Fərman müəllim, mən, 3 nömrəli məktəbin direktoru Hacalı müəllim və onun müavinləri (təəssüf ki, adlarını unutmuşam) büroya getdik. Qovluqlarımız Sahib Məmmədovda (o zamankı RPK-nın təbliğat və təşvirat şöbəsinin müdirində) idi. Sahib müəllim növbə ilə bizi təqdim etdi və təsdiq olunduq.
Bir neçə ildən sonra mən rayonun “Zəhmətkeş” qəzetinə şöbə müdiri təyin olunduğuma görə məktəb işlərindən uzaq düşdüm. Sonralar qəzetdə işləməklə bərabər məktəbdə dərs aparmağıma da icazə verildi. Həmin vaxtdan 3 nömrəli məktəbdə həftədə 6 saat Azərbaycan dili və ədəbiyyatından dərs deməyə başladım. Məktəbin kollektivi ilə doğmalaşadıq. Bu səbəbdən də məktəbi və onun kollektivini özümə həmişə doğma hesab etmişəm. Məktəb kollektivinin ildən-ilə artan uğurlarına ürəkdən sevinmişəm. Bu gün də sevinirəm.
Başda məktəbin direktoru Əhmədağa müəllim olmaqla, məktəbimizin müəllim və şagird kollektivini yubiley münasibətilə təbrik edirəm!
Yeni uğurlarınızı gözləyirik, dostlar!
Məmmədmirzə Rzayev
Gənclərin İnkişaf və Karyera Mərkəzi İsmayıllı nümayəndəliyi dekabr ayında: