9 sentyabr 2022-ci il tarixdə İsmayıllı rayon Gənclər və İdman idarəsinin və Azərbaycan Cüdo Federasiyasının birgə təşkilatçılığı ilə ənənəvi olaraq Cüdo idman növü üzrə şəhid Dəmirov Vüsalın əziz xatirəsinə həsr olunmuş, U-18 açıq İsmayıllı rayon birinciliyi keçirilib.
Tədbirin keçirilməsində əsas məqsəd Vətən müharibəsi şəhidlərinin qəhrəmanlığını idmançılar arasında təbliğ etmək, yeniyetmə və gənc idmançıların vətənpərvərlik ruhunun yüksəldilməsi və cüdo idman növünün inkişafı, kütləviliyinin təbliği və təşviqi təşkil edir.
İsmayıllı Olimpiya-İdman Kompleksində təşkil olunmuş yarışdan əvvəl Dövlət himni səsləndirilib, Vətənimizin müstəqilliyi və ərazi bütövlüyü uğrunda canından keçən şəhidlərimizin əziz xatirəsi bir dəqiqəlik sükutla yad olunub.
Tədbir açıq elan edildikdən sonra çıxışçılar şəhid Vüsal Dəmirovun keçdiyi şanlı döyüş yolundan söz açaraq qeyd ediblər ki, 2012-2013-cü il həqiqi hərbi xidməti başa vurduqdan sonra vətən sevgisi Vüsalı hərbi xidmətdə qalmasına sövq edib. O, bu müddət ərzində fərqləndiyinə görə hədiyyələr və mükafatlar alıb. 2016-cı ilin Aprel döyüşləri və 2020-ci ildə Tovuz döyüşlərinin də iştirakçısı olub. 27 sentyabr Vətən müharibəsi başlayar-başlamaz qəhrəmanımız torpaqlarımızı azad etmək üçün savaşa qatılıb. Vüsal Füzuli rayonunun azad olunması uğrunda gedən döyüşlərdə şəhidlik zirvəsinə ucalıb.
Turnirə paytaxt Bakıdan və digər regionlardan ümumilikdə 24 komanda qatılıb. 200-ə yaxın idmançının qatıldığı yarışın təntənəli açılış mərasimində İsmayıllı rayon İcra Hakimiyyətinin məsul əməkdaşları, Yeni Azərbaycan Partiyası İsmayıllı rayon təşkilatının sədri və əməkdaşları, İsmayıllı Rayon Gənclər və İdman İdarəsinin rəis müavini və əməkdaşları, RİH başçısının İsmayıllı şəhər İƏD üzrə nümayəndəsi, Azərbaycan Cüdo Federasiyasının Əməkdar müəllimləri və digər məşiqçi-müəllimlər, İsmayıllı Uşaq və Ailələrə Dəstək Mərkəzinin direktoru, Səfərbərlik və Hərbi Xidmətə Çağırış üzrə Dövlət Xidmətinin İsmayıllı rayon şöbəsinin əməkdaşı, İsmayıllı Olimpiya-İdman Kompleksinin direktoru, şəhid valideyinləri və idmançılar iştirak ediblər.
Gərgin və yüksək iradə nümayişi ilə keçən yarışın yekununda qaliblər tutduqları yerə uyğun olaraq tədbir təşkilatçıları tərəfindən medal və diplomlarla, Azərbaycan Cüdo Federasiyası tərəfindən qiymətli hədiyyələrlə mükafatlandırılıblar.
Sonda onu da qeyd edək ki, Azərbaycan Cüdo Federasiyası tərəfindən uğurlu fəaliyyətinin nəticəsi olaraq, İsmayıllı nümayəndəliyinə 72 ədəd yeni tatami döşəyi verilib.