İsmayıllı Dövlət Peşə Təhsil Mərkəzinin tələbələri 12 Avqust – Beynəlxalq Gənclər Günü münasibətilə İsmayıllı rayon Heydər Əliyev Mərkəzində keçirilən tədbirdə iştirak ediblər.

Tədbir Azərbaycan Respublikasının Dövlət Himninin səsləndirilməsi ilə başlayıb. Daha sonra Azərbaycanın müstəqilliyi və ərazi bütövlüyü uğrunda canlarından keçmiş şəhidlərin əziz xatirəsi ehtiramla yad olunub.

Çıxışlarda Beynəlxalq Gənclər Gününün əhəmiyyətindən bəhs edilərək bildirilib ki, gənclər cəmiyyətin inkişafında mühüm rol oynayır. Onların təhsil alması, peşə bacarıqlarına yiyələnməsi, ictimai həyatda fəal iştirakı və yaradıcı potensialının dəstəklənməsi ölkənin gələcək inkişafı baxımından xüsusi əhəmiyyət daşıyır. Gənclərin təşəbbüslərinin dəstəklənməsi, onların müxtəlif sosial, mədəni, idman və maarifləndirici layihələrə cəlb olunması üçün həyata keçirilən tədbirlərdən danışılıb.

Qeyd olunub ki, peşə təhsili alan gənclərin müasir əmək bazarının tələblərinə uyğun bilik və bacarıqlara yiyələnməsi, fəal və məsuliyyətli vətəndaş kimi formalaşması qarşıda duran əsas vəzifələrdəndir. Bu baxımdan gənclərin ictimai təşəbbüslərdə iştirakı onların həm şəxsi inkişafına, həm də cəmiyyətə faydalı fəaliyyətinə mühüm töhfə verir.

Tədbir çərçivəsində Dağlıq Şirvan Regional Gənclər və İdman İdarəsi tərəfindən il ərzində təşkil olunan müxtəlif tədbirlərdə fəal iştirak edən və ictimai fəallığı ilə seçilən gənclər Fəxri fərmanlarla təltif olunublar.

Təltif olunanlar arasında İsmayıllı Dövlət Peşə Təhsil Mərkəzinin tələbələri Günəş Qurbanova və Samir Qurbanov da yer alıblar. Onlar il ərzində keçirilən tədbirlərdə fəal iştirak etdiklərinə və ictimai fəallıqları ilə fərqləndiklərinə görə Fəxri fərmana layiq görülüblər.

Beynəlxalq Gənclər Günü münasibətilə fərqlənən tələbələrimizi təbrik edir, onlara təhsil və gələcək fəaliyyətlərində yeni uğurlar, möhkəm iradə və böyük nailiyyətlər arzulayırıq. Gənclərin uğuru, əslində, cəmiyyətin və ölkənin gələcəyinə qoyulan ən dəyərli sərmayələrdən biridir.