Yeni kitablar:

Aqrar inkişaf tariximizin bir hissəsi

İsmayıllı ictimaiyyətinə daha bir dəyərli nəşr təqdim olunub. Tanınmış jurnalist Daşdəmir Əjdəroğlunun qələmə aldığı “Vidadi Bayramov: Unudulmaz xatirələr” kitabı işıq üzü görüb. Nəşr ömrünü kənd təsərrüfatının inkişafına həsr etmiş, xüsusilə heyvandarlıq sahəsində qazandığı uğurlar və tətbiq etdiyi yeniliklərlə respublikada tanınan Vidadi Bayramovun həyat və fəaliyyətindən bəhs edir.

Kitabda Vidadi Bayramovun keçdiyi əmək yolu, kənd təsərrüfatının müxtəlif istiqamətlərində göstərdiyi səmərəli fəaliyyət, eləcə də heyvandarlıq sahəsində əldə etdiyi nailiyyətlər geniş şəkildə işıqlandırılır. Müəllif qəhrəmanın zəngin təcrübəsini, peşəkarlığını və insanlara münasibətini müxtəlif xatirələr, faktlar və şahid ifadələri əsasında oxuculara təqdim edir.

Daşdəmir Əjdəroğlu qeyd edir ki, kitabın əsas məqsədi zəhməti, təşəbbüskarlığı və işgüzarlığı ilə seçilən insanların həyat yolunu gələcək nəsillərə çatdırmaqdır. Müəllifin fikrincə, Vidadi Bayramovun fəaliyyəti kənd təsərrüfatı sahəsində çalışan gənclər üçün nümunə olmaqla yanaşı, ölkənin aqrar inkişaf tarixinin bir hissəsi kimi də böyük əhəmiyyət daşıyır.

Nəşrdə Vidadi Bayramovun həm peşəkar fəaliyyəti, həm də insani keyfiyyətləri ön plana çəkilir. Onu yaxından tanıyan insanların xatirələri, müxtəlif dövrlərdə çəkilmiş fotoşəkillər və arxiv materialları kitabın məzmununu daha da zənginləşdirir. Bu baxımdan əsər təkcə bir insanın həyat salnaməsi deyil, həm də müəyyən bir dövrün əmək və zəhmət tarixinin bədii-publisistik ifadəsi kimi diqqət çəkir.

“Vidadi Bayramov: Unudulmaz xatirələr” kitabının oxucular tərəfindən maraqla qarşılanacağı gözlənilir. Nəşr həm kənd təsərrüfatı sahəsində çalışan mütəxəssislər, həm də zəhmət adamlarının həyat və fəaliyyətinə maraq göstərən geniş oxucu auditoriyası üçün dəyərli mənbə hesab olunur.