Verilən qanlar həyata qaytarılan canlardır

Azərbaycan Respublikasının Prezidenti cənab İlham Əliyevin təsdiq etdiyi “Hemofiliya və talassemiyadan əziyyət çəkən uşaqlara qayğı” Dövlət Proqramı, həmçinin Heydər Əliyev Fondunun “Talassemiyasız həyat naminə” proqramına dəstək olmaq üçün İsmayıllıda qanvermə aksiyası keçirilib. “Sən də bizə qoşul, qanınla can ver!” şüarı ilə keçirilən aksiyanın məqsədi qan çatışmazlığı xəstəliklərindən əziyyət çəkənlərə kömək etməkdir.

Aksiya İsmayıllı Rayon İcra Hakimiyyətinin, Səhiyyə Nazirliyi Respublika Qan Bankının Şəki Bölməsi və Rayon Mərkəzi Xəstəxanası Publik Hüquqi Şəxsin birgə təşkilatçılığı ilə baş tutub. Kampaniyaya qoşulanlar əvvəlcə müayinədən keçirilib.

Aksiyada risk qrupuna daxil olmayan rayon sakinləri, könüllülər, icra hakimiyyəti, idarə və müəssisələrin əməkdaşları, qazilər və şəhid ailələri iştirak edib. Qanvermə aksiyasının iştirakçıları verilən qanların həyata qaytarılan canlar olduğunu vurğulayıblar.

İştirakçılarda motivasiya yaratmaq, onları ruhlandırmaq üçün rayon məktəbli rəssamları tərəfindən qanvermə prosesini əks etdirən rəsm əsərləri çəkilib.

“İsmayıllı xəbərləri”