Musa Yaqubdan seçmələr

Orda bulanıq su hopur torpağa,
Burda üzə çıxıb dönür bulağa.
Hələ ki vaxtımız var durulmağa,
Bir sabah sənindir, bir sabah mənim.

Qürbətdə vətənçün yanar, kim olsa,
Vətənin vətəndə bilək qədrini .
***
Hamıya pay verib ömürdən bir az,
Məndədir, səndədir müəllim ömrü.
***
Yaxşı adamları qoruyaq gəlin,
Bədxah niyyətləri, əyri nəzəri,
Düzlük qorxusuyla öldürmək olar.
Dişlərində zəhər gəzdirənləri
Yarpız qoxusuyla öldürmək olar.
***
Dost sözü bir çəmən ətri,
Namərd sındıracaq xətri.
Bir-iki bədxahdan ötrü,
Xeyirxah eldən incimə.
***
Namərd əllərinin izləri var,
Mənim də könlümün yarasında.
Bir məxluqdur,
Şeytanla insan arasında –
Namərdlər
***
Sərçeşməni bulandırıb özləri,
Bizi yeyən yalquzaqlar nə idi?
***
Bədxahları xar görmüşəm,
Ocağı kül, otu həşəm.
Mən çoxdandır gül əkmişəm,
Sən tikan əkdiyin cama.
***
İlahi, sən məni qaytar yoluma,
De ki, rəhm edirəm çaşan quluma.
****
O kimdir ki, o ağlasa, gülərəm,
Hiyləsini gözlərindən bilərəm.
Düşmən olsa, öhdəsindən gələrəm,
Dost olmasa mənə quyu qazanım.
****
Məsləksiz adam var, yaşar birtəhər,
Yoxdur ki, tapıla üz bişərəfdə.
Tərəzi gözünə girsə tərəflər,
O quyruq bulayar ağır tərəfdə.
***
Yeri bağlı, göyü bağlı,
Kibrit çöpü olsan belə.
Bir kimsənin çırağını
Yandırmamış söndünsə, heç.
Topladı: V.Salehov