6 dekabr 2023-cü il tarixində Dağlıq Şirvan Regional Mədəniyyət İdarəsinin tabeliyində olan İsmayıllı Rayon Mərkəzləşdirilmiş Kitabxana Sisteminin təşkilatçılığı ilə İsmayıllı rayonunda yaşayıb yaradan Qəhrəman Eloğlunun (Adgözəlov Qəhrəman Əbülhəsən oğlunun) “Buludsuz leysan” və “Sübhün nəğməsi” adlı kitablarının təqdimatı keçirilib.
Tədbirdə əvvəlcə Vətən torpaqlarının azadlığı uğrunda canından keçmiş şəhidlərimizin əziz xatirəsi bir dəqiqəlik sükutla yad edilib.
İsmayıllı rayon MKS-nin direktoru Orxan Ağayev tədbir iştirakçılarını salamladıqdan sonra kitabların müəllifi haqqında qısa məlumat verib.
Yazıçı-şairin şeirinə həsr olunmuş videoçarx nümayiş olunub. Tədqiqatçı Murad Rafiqoğlu yazıçının şəhidlərə həsr etdiyi şeiri səsləndirib.
Tədbirdə yerli şairlərdən Hacıməmməd Məmmədov, Cəbrayıl Hüseyn, Şahməmməd Dağlaroğlu, Füzuli Zərnavalı Q.Eloğlunun yaradıcılığına aid fikirlərini açıqlayıblar.
Çıxış edənlər Qəhrəman Eloğlu yaradıcılığı işığına toplaşdıqlarını bildiriblər. Hazırda hər hansı bir kitabın necə çətinliklə ərsəyə gəlməsindən, müəllifin gözəl şair, yazıçı peşəkar rəssam-heykəltəraş olması ilə bərabər həm də taxta üzərində oyma sənətinin bənzərsiz, mahir ustası olduğunu da vurğulayıb, bu zəhmətkeş insanla bağlı xoş xatirələrini bölüşüblər.
Sonda müəllif şeirlərindən bir neçəsini səsləndirib. Tədbirdə iştirak edənlərə və təqdimatı təşkil edənlərə təşəkkürünü bildirib.
Tədbirin sonunda sənətkarın kitabxananın foyesində sərgilənən bir-birindən maraqlı, zövq oxşayan əl işlərinə baxış keçirilib, xatirə şəkli çəkilib.
“İsmayıllı xəbərləri”