Dil xalqın mənəvi pasportu, əlifba isə onun yazılı yaddaşıdır. Xalqın keçdiyi tarixi yol, yaratdığı mədəniyyət, elmi irsi və ədəbi sərvətləri məhz dil və əlifba vasitəsilə əsrləri adlayaraq bu günümüzə gəlib çatmışdır. Azərbaycan dili milli kimliyimizin əsas sütunlarından, latın qrafikalı Azərbaycan əlifbası isə müstəqilliyimizin və milli-mənəvi dəyərlərimizə sədaqətimizin rəmzlərindən biridir.

Ümummilli Lider Heydər Əliyevin 9 avqust 2001-ci il tarixli Fərmanına əsasən təsis edilən Azərbaycan Əlifbası və Azərbaycan Dili Günü ana dilimizin dövlət dili kimi nüfuzunun daha da möhkəmləndirilməsinə, latın qrafikalı əlifbanın cəmiyyət həyatında tam bərqərar olmasına və milli-mədəni irsimizin qorunmasına xidmət edən əlamətdar bir tarixdir. Bu gün hər bir vətəndaşı dilimizin saflığını qorumağa, onu sevə-sevə yaşatmağa və gələcək nəsillərə olduğu kimi ötürməyə çağırır.

Azərbaycan Əlifbası və Azərbaycan Dili Günü münasibətilə bütün soydaşlarımızı ürəkdən təbrik edir, xalqımızın milli birliyini, mənəvi gücünü və dövlətçilik ənənələrini yaşadan doğma Azərbaycan dilimizin daim uca tutulmasını arzulayırıq. Qoy ana dilimiz hər zaman milli həmrəyliyimizin səsi, əlifbamız isə tariximizi və gələcəyimizi birləşdirən əbədi körpü olsun.