Vətəndaş müraciətləri diqqət mərkəzində

Vətəndaşların müraciətlərinin dinlənilməsi, onları narahat edən məsələlərin yerindəcə araşdırılması və həlli istiqamətində zəruri tədbirlərin görülməsi dövlət idarəçiliyinin mühüm istiqamətlərindən biridir. Bu məqsədlə mərkəzi icra hakimiyyəti orqanları rəhbərlərinin şəhər və rayonlarda vətəndaşların qəbulu davam etdirilir.

Qəbul cədvəlinə uyğun olaraq avqustun 10-da ekologiya və təbii sərvətlər naziri Rəşad İsmayılov İsmayıllı rayonunda vətəndaşlarla görüşüb. Qəbulda İsmayıllı, Qəbələ, Oğuz, Ağsu və Şamaxı rayonlarından olan sakinlər iştirak ediblər.

Görüşdən əvvəl nazir və nümayəndə heyəti Ümummilli Lider Heydər Əliyevin İsmayıllı şəhərindəki abidəsini ziyarət edib, abidənin önünə gül dəstələri qoyub, Ulu Öndərin əziz xatirəsini ehtiramla yad ediblər.

Sonra vətəndaşların qəbulu keçirilib. Sakinlər onları narahat edən məsələləri birbaşa nazirə çatdırmaq, təklif və müraciətlərini bildirmək imkanı əldə ediblər. Müraciətlər müxtəlif istiqamətləri əhatə edib.

Ətraf mühitin mühafizəsi, yaşıllıqların qorunması və artırılması, mineral xammaldan istifadə, təbii sərvətlərdən səmərəli yararlanma, məşğulluq və digər məsələlərlə bağlı müraciətlər diqqətlə dinlənilib.

Qaldırılan məsələlərin hər biri üzrə mövcud vəziyyətin araşdırılması, aidiyyəti qurumların iştirakı ilə müvafiq tədbirlərin görülməsi və qanunvericiliyin tələblərinə uyğun həlli ilə bağlı tapşırıqlar verilib.

Vətəndaş qəbullarının belə birbaşa ünsiyyət formatında keçirilməsi insanların problemlərinin daha yaxından öyrənilməsinə, onların haqlı narahatlıqlarının operativ şəkildə araşdırılmasına və mümkün həll yollarının müəyyənləşdirilməsinə imkan yaradır.

İsmayıllıda keçirilən qəbul da bir daha göstərdi ki, vətəndaş müraciətləri dövlət qurumlarının diqqət mərkəzindədir. Əsas məqsəd isə hər bir müraciətə həssas yanaşmaq, qaldırılan məsələlərin həlli üçün imkanları səfərbər etmək və vətəndaş məmnunluğunun təmin olunmasına töhfə verməkdir.