Yarım əsrlik həyat yolu…      

…Onun öz əməlləri ilə yarım əsrdə yaratdığı kəhkəşan insanların ürəyində, Tanrının nəzərindədir. 50 ildə insanlar tərəfindən ancaq bu qədər sevilmək olar… Bu ömrün sahibi Mahmud Süleymanov haqqında danışıram. Bu gün dəyərli insan, etibarlı dost və məsuliyyətli dövlət qulluqçusu Mahmud Süleymanovun 50 illik yubileyi münasibətilə onu səmimi qəlbdən təbrik etmək böyük sevinc və qürur hissi doğurur.

Yarım əsrlik həyat yolu zəhmət, məsuliyyət, insanlara xidmət və qazandığı hörmətlə yadda qalan mənalı bir ömür tarixidir. Mahmud Süleymanov uzun illərdir ki, dövlət idarəçiliyi sahəsində öz peşəkarlığı, prinsipial mövqeyi və yüksək məsuliyyət hissi ilə seçilən şəxslərdəndir. Bu gün İsmayıllı Rayon İcra Hakimiyyəti başçısının birinci müavini kimi fəaliyyət göstərərək rayonun sosial-iqtisadi inkişafı, insanların rifahının yaxşılaşdırılması və dövlət siyasətinin yerli səviyyədə uğurla həyata keçirilməsi istiqamətində mühüm işlər görür.

Onun idarəçilik bacarığı, vətəndaşlara diqqəti və problemlərin həllinə həmişə həssas yanaşması Mahmud müəllimi rayon ictimaiyyətinin hörmət qazanan simalarından birinə çevirib. Mənalı və şərəfli ömürlüyündə M.Süleymanovun bu sahədə çalışdığı illər həyatının xüsusi mərhələsini, bəhrəli dövrünü, maraqlı yaşantılarını təşkil edir. İstedadı, işgüzarlığı, təşkilatçılığı sayəsində o bu vəzifəyə layiq görülüb.

Əvvəlki illərdə müxtəlif vəzifələrdə çalışdığı zaman qazandığı zəngin təcrübə, idarəetmə məharəti, böyük fəaliyyət potensialı, hərtərəfli dünyagörüşü, gözəl mənəviyyatı RİH başçısının birinci müavini seçilməsinə münbit zəmin yaradıb və hazırda da o bu vəzifəni ləyaqətlə daşıyır. O, hər zaman insanların qayğıları ilə maraqlanan, onların problemlərinə diqqətlə yanaşan və dövlətə sədaqətlə xidmət edən bir rəhbər kimi tanınır.

Bu xüsusiyyətlər isə onun həm işgüzar mühitdə, həm də cəmiyyət arasında böyük nüfuz qazanmasına səbəb olub. Lakin Mahmud müəllimi dəyərli edən təkcə onun vəzifəsi və peşəkar fəaliyyəti deyil. O, eyni zamanda səmimi, mərd və dostluğa böyük dəyər verən bir insandır. Onu tanıyan hər kəs bilir ki, dostluqda sədaqətli, sözdə və əməldə etibarlı, çətin günlərdə yanında olan insanlardan biridir. Məhz bu insani keyfiyyətlər onu ətrafındakı insanların qəlbində daha da ucaldır. Mahmud müəllim orta məktəbdə, təhsil aldığı ali məktəblərdə, ailədə, qonşuda da indiki kimi, hər zaman hörmətli, xətirli olub.

Gərək hər bir hərəkətin, davranışın arxsına bir nümunəvilik dayansın ki, seviləsən, seçiləsən. Mahmud müəllim büllur kimi təmiz insan olduğunu, obyektivliyini, halallığını öz işi, davranışı, insanlara münasibətilə dəfələrlə sübut edib. Bu həqiqətlərə onu tanıyanların heç birində şübhə olmayıb. Elə bu səbəbdən də onu fəaliyyətində də, dövlət qulluğunda da, insanlıqda da düzgünlüyünə inanır, onu sədaqətli dost, hikmətli ziyalı kimi də sayırlar.

M.Süleymanov hansı sahədə çalışıbsa, öz işi, qanunpərəstliyi, davranışı, xoş rəftarı, dövlətçiliyə sədaqəti, ciddi münasibəti, obyektivliyi ilə hamının rəğbətini qazanıb. Zəhmətsevərliyi, işinə vurğunluğu, alicənablığı, həmişə onunla yol yoldaşı olub.  Həyata atıldığı ilk illərdən indiyədək də o, bu insanlığı, alicənablığı qoruyub saxlayıb.

Ötən günlərdən söz düşəndə əməyə, təhsilə yiyələnməsində valideynlərinin böyük rolundan söz açır. Deyir ki, məndə olan bütün yaxşı xüsusiyyətləri, müsbət keyfiyyətləri valideynlərim aşılayıblar. Bu, nəsildən-nəsilə keçən tərbiyədir.

Mahmud müəllimin həyat yoluna qısaca nəzər saldıqda adamın gözləri qarşısında kiçik yaşlarından ailəyə dayaq olan, etimad göstərilərək tapşırılan işin öhdəsindən layiqincə gələn dövlət adamı, hərtərəfli biliyi, təşkilatçılıq qabiliyyəti olan, çalışdığı kollektivin qayğısına qalan insan surəti canlanır.

Mahmud müəllim tutduğu vəzifənin tapşırılan işin məsuliyyətini dərk və hiss edən və onun öhdəsindən şərəflə gələn insandır. Harada çalışıbsa, orada hörmət qazanıb, zahiri görkəmi ilə daxili aləmi eynidir. Onun sözü də, əməli də birdir. Necə deyərlər, natural adamdır. Özü kimi, sözü də bütövdür. Bir sözlə, şəxsiyyəti ilə insanlığı vəhdətdədir. O, üzü ağ dünyanın adamıdır.  Bu əzəməti ilə ona görə hamı tərəfindən sevilir ki, böyük vəzifə sahibi və ləyaqətli insan statusuna malik ola-ola yetərincə sadədir. Heç kəsin qəlbinə toxunmaz, hamıya bərabər dərəcədə  istiqanlıdır. Ətrafdakılara olan xoş münasibəti sədd, sərhəd tanımır…

Bu yerdə bir anlığa bu fikirlər keçdi beynimdən:

İnsan çoxdur dünyada, o, sadə – dürdanədi,

 Çalışdığı  meydanda, hər işi mərdanədi.

50 illik həyat yolu böyük təcrübə, müdriklik və həyat məktəbidir. Bu illər ərzində Mahmud müəllim həm dövlət qulluğunda, həm də şəxsi həyatında nümunəvi mövqeyi ilə seçilərək hörmət və rəğbət qazanıb. Onun zəhməti, fədakarlığı və insanlara olan münasibəti gələcək nəsillər üçün də gözəl örnəkdir. Mahmud müəllim valideyinləri üçün əziz övlad, övladları üçün əziz atadır!

Bu əlamətdar yubiley günündə Mahmud Süleymanova möhkəm can sağlığı, uzun ömür, ailə səadəti və gələcək fəaliyyətində yeni uğurlar arzulayırıq. Qoy həyatının bundan sonrakı mərhələsi də uğurlarla, xoş hadisələrlə və gözəl xatirələrlə zəngin olsun. Qoy dövlətə və xalqa xidmət yolunda atdığı addımlar daim uğur gətirsin.

Hörmətli Mahmud müəllim, 50 yaşınız mübarək! Qoy həyat yolunuz həmişə işıqlı, uğurlu və şərəfli olsun. Sizi tanıyan hər kəsin hörməti və sevgisi daim sizinlə olsun. Yubileyiniz mübarək!

P.S. Dəyərli Mahmud müəllim, bəlkə də təbrik üçün gecikmişəm. Sizə olan dost və qardaş sevgimi də bilirsiniz. Dostuma və qardaşıma təbrikim ürəyimin sözləridir. Nə yaxşı ki, varsınız və nə yaxşı ki, çoxlarının sevimlisi olmaqla  mənim də dostumsunuz!

Sizə dost və qardaş sayğılarımla

Yusif Məhəmmədoğlu