Suvarma mövsümünə hazırlıq işləri davam edir               

İsmayıllı Suvarma Sistemləri İdarəsi tərəfindən torpaq məcralı kanallar texnikalar vasitəsi ilə lildən təmizlənir, suvarma suyunun maneəsiz axını təmin edilir. Ötən il balansda olan Aşıqbayramlı su anbarı əsaslı təmir olunaraq yenidən istifadəyə verilib. Bundan başqa 34 ədəd subartezian quyusu cari təmir, Talıstan kəndində isə 1 ədəd subartezian quyusu əsaslı təmir olunub. 38 ədəd hidrotexniki qurğu, 11 ədəd hidrometrik post və 2 kilometr kanal cari təmir olunub.

Böyük Qafqaz sıra dağları ilə əhatələnən İsmayıllı rayonu ərazisindən 5 gursulu çay keçir. Çaylar yaz, payız aylarında, daşqın və sel zamanı əkin sahələrinə, eləcə də yaşayış məntəqələrinə ziyan vurur.

Ancaq əvvəlcədən görülən qabaqlayıcı tədbirlər nəticəsində sel sularının qarşısı alınır. Belə ki, çayların məcraları buldozerlər vasitəsilə təmizlənir, çay sahillərinə daş-beton bəndlər vurulur. Bu işlər həmçinin rayon ərazisindən axan Talıstançay, Girdimançay, Cülyançay, Göyçayçay və Axoxçayda da davam etdirilir.

Qeyd edək ki, İsmayıllı Suvarma Sistemləri İdarəsi rayonda 8833 hektar suvarılan torpaq sahəsinə xidmət edir. Bu sahələrin suvarılması Aşıqbayramlı su anbarı, Yuxarı Şirvan kanalı, Göyçayçay, Axoxçay, Cülyançay, Talıstançay, Əyriçay və Girdimançay çayları vasitəsilə həyata keçirilir.