İslamda şəhidlik zirvəsi

Yanvarın 19-da İsmayıllı Rayon İcra Hakimiyyətinin və Dini Qurumlarla İş üzrə Dövlət Komitəsinin (DQİDK) Şamaxı Bölgəsi üzrə şöbəsinin birgə təşkilatçılığı ilə “İslamda şəhidlik zirvəsi – 20 Yanvar şəhidləri” mövzusunda tədbir keçirilib.

Tədbirdə DQİDK-nın Şamaxı bölgəsi üzrə şöbəsinin əməkdaşı Elnur Mehdiyev, rayon İcra Hakimiyyəti başçısı aparatının İctimai-siyasi və humanitar məsələlər şöbəsinin müdir müavini – dini qurumlarla işin təşkilatçısı Murad Məhərrəmov, Qafqaz Müsəlmanları İdarəsinin (QMİ) səlahiyyətli nümayədəsi Şahzadə Bilalov, dini icma sədrləri və gənclər iştirak ediblər. Öncə şəhidlərin əziz xatirəsi bir dəqiqəlik sükutla yad edilib.
Tədbiri giriş sözü ilə açan DQİDK-nın Şamaxı bölgəsi üzrə şöbəsinin əməkdaşı Elnur Mehdiyev 20 Yanvar faciəsinin xalqımızın yaddaşında əbədi iz qoyduğunu xatırladaraq bildirib ki, Vətənimizin müstəqilliyi, ərazi bütövlüyü və suverenliyi uğrunda canlarını fəda etmiş şəhidlərimizin əziz xatirələrini yaşatmaq, ruhlarına dualar oxumaq hər bir azərbaycanlının vətəndaşlıq borcudur.
RİH-in məsul əməkdaşı M.Məhərrəmov çıxış edərək xalqımızın başına açılan müsibətlərin, yaşanan faciələrin gələcəyimiz olan gənclərə çatdırılması baxımından bu cür tədbirlərin keçirilməsinin böyük əhəmiyyət daşıdığını, 20 Yanvar faciəsinin qürur tariximiz olduğunu diqqətə çatdırıb.
Daha sonra çıxış edən QMİ-nin səlahiyyətli nümayədəsi Ş.Bilalov islamda şəhidlik məqamı, Vətən sevgisi haqqında danışıb.
Sonda vətənimizin müstəqilliyi, ərazi bütövlüyü uğrunda canlarından keçmiş şəhidlərimizin ruhuna dualar oxunub.
“İsmayıllı xəbərləri”