Səmədov Saday Ağalar oğlu
İsmayıllı ziyalılarına ağır itki üz vermişdir. Təcrübəli jurnalist, səmimi yoldaş və dost olan, “Girdiman” qəzetinin sabiq redaktoru Saday Səmədov aramızdan getmişdir.
Saday Ağalar oğlu Səmədov 1942-ci ildə rayonumuzun Qalagah kəndində anadan olmuşdur. Qonşu Hacıhətəmli kəndində orta məktəbi bitirərək iki il kolxozda işləmişdir. 1962-ci ildə Bakı şəhərinə gələrək Azboşifer və Keramika Məmulatları Kombinatında işə düzəlmişdir.
1964-cü ildə Azərbaycan Dövlət Universitetinin (indiki BDU) jurnalistika fakültəsinə daxil olmuş, 1968-ci ildə universiteti bitirərək təyinatla Ağdaş rayonunda çıxan “Əmək” qəzetində ədəbi işçi kimi əmək fəaliyyətinə başlamışdır. 1970-ci ilin fevralınadək burada işləmişdir. Həmin ildən İsmayıllı rayonunda çıxan “Zəhmətkeş”qəzetində baş ədəbi işçi kimi fəaliyyətə başlamışdır. Bir müddət sonra həmin qəzetin kənd təsərrüfatı şöbəsinin müdiri vəzifəsinə irəli çəkilmişdir.
1975-ci ildə S.Səmədov İsmayıllı Rayon Partiya Komitəsinə təlimatçı, 1978-ci ildə isə rayon partiya komitəsində siyasi maarif kabinetinə müdir təyin edilmişdir.
O, bir neçə ildən sonra yenidən redaksiyaya qayıtmış, burada kənd təsərrüfatı şöbəsinin müdiri, 1981-ci ildən “Zəhmətkeş” qəzetinin redaktor müavini işləmişdir. Bu qəzet1991-ci ildə “Cavanşir yurdu” adı ilə çıxmağa başlamış, 2001-ci ildə bağlanmışdır.
2002-ci ildə rayonda “Girdiman”adı ilə yeni qəzet nəşrə başlayanda Saday Səmədov həmin qəzetin redaktoru təyin edilir. 2011-ci ildə pensiyaya çıxanadək həmin vəzifədə çalışıb.
S.Səmədov 2012-ci il dekabrın 27-də vəfat etmişdir. O, mehriban insan, yaxşı ziyalı kimi dostlarının və tanışlarının qəlbində əbədi yaşayacaqdır.
Allah rəhmət eləsin, qəbri nurla dolsun.
Yoldaşlarından bir qrup.
